ក្រុងបាងកកៈ ការព្យាករពីការស្ទុះងើបឡើងវិញនៃវិស័យទេសចរណ៍ក្រោយការកាន់កាប់របស់របបយោធាថៃនៅតែមានការលំបាក ដោយស្ថិតិនៅ ខែសីហា បង្ហាញថា ភ្ញៀវទេសចរអន្តរជាតិបានធ្លាក់ចុះ ១១,៨៥ ភាគរយធៀបនឹងពេលដូចគ្នាកាលពីឆ្នាំមុន។ ការធ្លាក់ចុះចំនួនភ្ញៀវទេសចរអន្តរជាតិនៅ ខែសីហា បានធ្លាក់ចុះបន្ទាប់ពីការថយចុះ ១០,៩ ភាគរយនៅ ខែសីហា និង ២៤,៤ ភាគរយនៅ ខែមិថុនា ធៀបនឹងរយៈពេលដូចគ្នាកាលពីឆ្នាំមុន។
ក្នុងរយៈពេល ៨ ខែដំបូងក្នុងឆ្នាំនេះ ការមកដល់របស់ក្រុមភ្ញៀវទេសចរបរទេសនៅ ប្រទេសថៃ មានចំនួនសរុប ១៥,៧ លាននាក់ ពោលគឺបានធ្លាក់ចុះ ១០,៦៦ ភាគរយធៀបនឹងចំនួន ១៧,៥៧ លាននាក់ក្នុងរយៈពេលដូចគ្នាកាលពីឆ្នាំមុន នេះបើយោងតាមសេចក្តីរាយការណ៍នៅលើគេហទំព័ររបស់នាយកដ្ឋានទេសចរណ៍។
ការមកដល់របស់ក្រុមភ្ញៀវទេសចរនៅតាមបណ្តាប្រទេសផ្សេងៗក្នុងតំបន់អាស៊ានដែលស្មើនឹង ២៨,៩ ភាគរយនៃក្រុមភ្ញៀវទេសចរសរុបដែលមកទស្សនា ប្រទេសថៃ នៅ ខែសីហា បានធ្លាក់ចុះ ២១,៦ ភាគរយធៀបនឹងរយៈពេលដូចគ្នាមកនៅត្រឹមចំនួន ៥៣៣ ៨៥៧ នាក់។ គិតចាប់តាំងពីដើមឆ្នាំមកដល់ថ្ងៃ ទី៣១ ខែសីហា ចំនួនភ្ញៀវទេសចរក្នុងតំបន់អាស៊ានបានធ្លាក់ចុះ ១២,១ ភាគរយមកត្រឹម ៤,១៨ លាននាក់។
តួលេខទាំងនេះបានធ្លាក់ចុះយ៉ាងខ្លាំង ក៏ដូចជាក្រុមភ្ញៀវទេសចរមកពីទីផ្សារនៅអាស៊ីបូព៌ាដែរ ដូចជា ប្រទេសចិន ហុងកុង កូរ៉េខាងត្បូង ជប៉ុន និង តៃវ៉ាន់ ដែលក្រុមអ្នកដំណើរហាក់ដូចជាព្រួយបារម្ភអំពីសន្តិសុខ។
ក្រុមភ្ញៀវទេសចរចិនមានចំនួនស្មើនឹង ២០,២ ភាគរយនៃចំនួនភ្ញៀវទេសចរទាំងអស់ដែលមកទស្សនានៅ ប្រទេសថៃ នៅ ខែសីហា ដោយមានចំនួនសរុប ៤៥២ ០៨៦ នាក់ ពោលគឺធ្លាក់ចុះ ៥,២ ភាគរយធៀបនឹងរយៈពេលដូចគ្នាកាលពីឆ្នាំមុន។ តួលេខនេះបានកើនឡើងបើធៀបនឹងការធ្លាក់ចុះ ២៥ ភាគរយនៅ ខែកក្កដា តែគិតចាប់តាំងពីដើមឆ្នាំរហូតមកដល់ពេលនេះ ចំនួនភ្ញៀវទេសចរចិននៅតែធ្លាក់ចុះ ១៨,៩ ភាគរយមកនៅត្រឹមចំនួន ២,៦៧ លាននាក់។
ការធ្លាក់ចុះចំនួនភ្ញៀវទេសចរនេះមានចំនួនកាន់តែច្រើនចំពោះប្រទេសបួនផ្សេងទៀត ដែលមានចំនួនសរុបស្មើនឹង ១៥ ភាគរយនៃចំនួនភ្ញៀវទេសចរអន្តរជាតិដែលមកទស្សនា ប្រទេសថៃ ក្នុងរយៈពេល ៨ ខែដំបូងក្នុងឆ្នាំនេះ ដូចជា ភ្ញៀវទេសចរហុងកុង ធ្លាក់ចុះ ៣៣,៩ ភាគរយ ជប៉ុន ធ្លាក់ចុះ ២០,៦ ភាគរយ កូរ៉េខាងត្បូង ធ្លាក់ចុះ ១៤,៧ ភាគរយ និងតៃវ៉ាន់ធ្លាក់ចុះ ៣០,៥ ភាគរយ។
វិស័យទេសចរណ៍មានទំហំស្មើនឹង ១០ ភាគរយនៃសេដ្ឋកិច្ចថៃ ហើយក្រុមអ្នកបង្កើតគោលនយោបាយបាននិងកំពុងព្យាករពីការស្ទុះងើបឡើងវិញយ៉ាងឆាប់រហ័ស បន្ទាប់ពីរដ្ឋប្រហារកាលពីថ្ងៃ ទី២២ ខែឧសភា បានបញ្ចប់វិបត្តិនយោបាយដែលបានអូសបន្លាយពេលអស់ជាច្រើនខែមក។
ភ្ញៀវទេសចរមកពីអឺរ៉ុបបានធ្លាក់ចុះ ៣,៣ ភាគរយនៅ ខែសីហា និងបានថយចុះ ៣,២ ភាគរយក្នុងរយៈពេល ៨ ខែដំបូងក្នុងឆ្នាំនេះ៕
No comments:
Post a Comment