ភ្នំពេញៈ ក្រុមហ៊ុនទូរគមនាគមន៍ EMAXX កាលពីម្សិលមិញបានចុះហត្ថលេខាលើកិច្ចព្រមព្រៀងមួយជាមួយក្រុមហ៊ុន Huawei ដែលជាក្រុមហ៊ុនបច្ចេកវិទ្យាឈានមុខគេរបស់ ប្រទេសចិន ដើម្បីកសាងបណ្ដាញ 4G LTE នៅទូទាំងប្រទេស។
តំណាងមកពីក្រុមហ៊ុនទាំងពីរ និងក្រសួងប្រៃសណីយ៍ និងទូរគមនាគមន៍កម្ពុជា បានចូលរួមក្នុងពិធីចុះហត្ថលេខាជាផ្លូវការនៃកិច្ចព្រមព្រៀងនេះ។
លោក Sean Ngu សមាជិកក្រុមប្រឹក្សាភិបាលរបស់ក្រុមហ៊ុន EMAXX បានថ្លែងថា៖ «គោលបំណងគឺដើម្បីបំពេញតម្រូវការប្រើប្រាស់ទិន្នន័យដែលកំពុងកើនឡើងនៅកម្ពុជា។ ក្រុមហ៊ុន EMAXX និងក្រុមហ៊ុន Huawei នឹងដំណើរការបង្កើតបណ្ដាញ 4G LTE ប្រកបដោយការទុកចិត្ត និងស្ថិរភាពបំផុតនៅទីនេះ»។
តាមសេចក្ដីប្រកាសព័ត៌មានរួមមួយរបស់ក្រុមហ៊ុន EMAXX និងក្រុមហ៊ុន Huawei ក្រុមហ៊ុនទាំងពីរនេះមានបំណងដំឡើងស្ថានីយ៍មូលដ្ឋាន 4G នៅក្នុងទីក្រុងសំខាន់ៗ ៨ រួមទាំង ទីក្រុងភ្នំពេញ ក្រុងសៀមរាប ក្រុងព្រះសីហនុ និងក្រុងបាត់ដំបង ផងដែរក្នុងរយៈពេលពីរឆ្នាំខាងមុខ។
ការប្រកាសកាលពីម្សិលមិញធ្វើឡើងបន្ទាប់ពីក្រុមហ៊ុន EMAXX ដែលភាគហ៊ុន ៦៥ ភាគរយរបស់ក្រុមហ៊ុននេះត្រូវបានកាន់កាប់ដោយក្រុមហ៊ុនទូរគមនាគមន៍ចិន Shenzhen Keybridge Communications (SKC) បានប្រកាសកាលពី ខែមេសា ថា ខ្លួនបានបោះបង់ចោលរាល់ប្រតិបត្តិការលក់រាយទាំងអស់ និងកំពុងផ្តោតការយកចិត្តទុកដាក់លើគម្រោងហេដ្ឋារចនាសម្ព័ន្ធទូរគមនាគមន៍រយៈពេលបីឆ្នាំដែលមានតម្លៃ ១៤៨ លានដុល្លារអាមេរិក។
លោក កែន ចាន់មេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ កាលពីម្សិលមិញបានស្វាគមន៍ភាពជាដៃគូនេះ និងបានអំពាវនាវឲ្យក្រុមហ៊ុន EMAXX និងក្រុមហ៊ុន Huawei ត្រូវជួយគាំទ្រដល់គោលនយោបាយព្រាងស្តីពីរលកអាកាសរបស់រដ្ឋាភិបាលដែលកំពុងត្រូវបានបង្កើតឡើង។
ទន្ទឹមនឹងនេះ លោក ចាន់មេត្តា បានថ្លែងថា ក្រសួង និងវិស័យឯកជនកំពុងបន្តការចរចាអំពីច្បាប់ទូរគមនាគមន៍ដ៏ចម្រូងចម្រាស់។ លោកបន្ថែមថា៖ «យើងបានពិភាក្សាផ្ទៃក្នុងអំពីមតិយោបល់របស់វិស័យឯកជនទាក់ទងនឹងច្បាប់នេះ កាលពីម្សិលមិញ (ថ្ងៃអង្គារ) ដូច្នេះនៅពេលនេះ យើងកំពុងពិនិត្យមើលមតិយោបល់ទាំងនោះ។ យើងបានប្ដេជា្ញចិត្តជាមួយរដ្ឋាភិបាលថា យើងនឹងបញ្ចប់នីតិវិធីនេះឲ្យបានឆាប់តាមដែលអាចធ្វើទៅបាន»។
លោកបញ្ជក់ថា៖ «យើងចង់ការពារវិនិយោគិន ហើយយើងចង់ជំរុញឲ្យពួកគេបង់ពន្ធកាន់តែច្រើន។ នោះគឺជាគោលបំណងនៃការតាក់តែងច្បាប់ទូរគមនាគមន៍នេះឡើង»៕
No comments:
Post a Comment