ក្រុងហាណូយៈ ប្រទេសវៀតណាម បានដាក់ចេញច្បាប់មួយដែលតម្រូវឲ្យក្រុមហ៊ុនរបស់រដ្ឋ ចុះបញ្ជីភាគហ៊ុនឲ្យបានកាន់តែឆាប់រហ័ស បន្ទាប់ពីការបោះផ្សាយលក់ភាគហ៊ុនជាសាធារណៈលើកដំបូង ក្នុងគោលបំណងបង្កើនល្បឿនកម្មវិធីឯកជននីយកម្មដែលមានភាពយឺតយ៉ាវជាងការគ្រោងទុក។
ចាប់ពីថ្ងៃ ទី១ ខែវិច្ឆិកា ខាងមុខនេះទៅ ក្រុមហ៊ុនដែលបានបោះផ្សាយលក់មូលបត្រជាសាធារណៈលើកដំបូងរួចហើយ ត្រូវចុះបញ្ជីភាគហ៊ុននៅទីផ្សាររំលងបញ្ជរ UpCom ផ្លូវការក្នុងរយៈពេល ៩០ ថ្ងៃនៃការទទួលបានវិញ្ញាបនបត្រចុះបញ្ជីពាណិជ្ជកម្ម។ នេះបើយោងតាមសេចក្តីសម្រេចមួយដែលចេញដោយលោកនាយករដ្ឋមន្ត្រីវៀតណាម Nguyen Tan Dung ដែលបានចេញផ្សាយនៅលើគេហទំព័ររបស់រដ្ឋាភិបាលវៀតណាម។
បន្ទាប់មកភាគហ៊ុនទាំងនោះត្រូវចាប់ផ្តើមជួញដូរនៅលើផ្សារហ៊ុនមួយក្នុងចំណោមផ្សារហ៊ុនធំទាំងពីររបស់វៀតណាមនៅ ទីក្រុងហាណូយ ឬទីក្រុងហូជីមិញ ក្នុងអំឡុងពេលមួយឆ្នាំនៃវិញ្ញាបនបត្រ។
គិតចាប់តាំងពីការប្រកាសផែនការមួយកាលពី ខែកុម្ភៈ ដើម្បីលក់ភាគហ៊ុននៅក្នុងសហគ្រាសចំនួន ៤៣២ នៅត្រឹមចុង ឆ្នាំ២០១៥ មកមានតែសហគ្រាសចំនួន ៣៥ ប៉ុណ្ណោះដែលបានបោះផ្សាយ IPO ហើយពុំមានភាគហ៊ុនណាមួយក្នុងចំណោមភាគហ៊ុនទាំងនោះត្រូវបានជួញដូរនៅឡើយទេ។ ប្រទេសវៀតណាម បានប្រមូលថវិកាចំនួន ២,៥៤ ពាន់ពាន់លានដុង (១១៩,៨ លានដុល្លារ) នៅឆ្នាំនេះ ពោលគឺមានចំនួនប្រមាណពាក់កណ្តាលនៃទិសដៅប្រមូលថវិកា ៤,៧៤ ពាន់ពាន់លានដុងខណៈក្រុមហ៊ុននានាបានប្រញាប់បោះផ្សាយលក់មូលបត្រដោយគ្មានការធ្វើទីផ្សារជាមុនជាមួយក្រុមវិនិយោគិន។
លោក Pham Luu Hung អនុប្រធានផ្នែកប្រឹក្សាយោបល់ស្រាវជ្រាវវិទ្យាស្ថាន និងវិនិយោគនៅក្រុមហ៊ុន Saigon Securities Inc ដែលជាក្រុមហ៊ុនជើងសាធំជាងគេនៅ ប្រទេសវៀតណាម មានមូលដ្ឋាននៅ ទីក្រុងហាណូយ បានថ្លែងថា៖ «នេះគឺជាជំហានសំខាន់មួយដើម្បីជួយកាត់បន្ថយពេលវេលារាប់ចាប់តាំងពីការបោះផ្សាយ IPO រហូតដល់ការចុះបញ្ជីក្នុងផ្សារហ៊ុន ដែលបង្កើតសាច់ប្រាក់ងាយស្រួលសម្រាប់ភាគហ៊ុន»។
ច្បាប់នេះក៏អនុវត្តផងដែរចំពោះសហគ្រាសរដ្ឋ ដែលបានលក់ភាគហ៊ុនរួចហើយទៅឲ្យសាធារណជន៕
No comments:
Post a Comment